«Асанбай Асқаров» атындағы дендрологиялық саябақ №1

«Асанбай Асқаров атындағы дендрологиялық» саябақ — қаланың ең ірі жасыл аймақтарының бірі. 117 гектар аумақты қамтитын саябақ табиғат аясында демалуға қолайлы көрікті орын болып саналады.

«Асанбай Асқаров» атындағы дендрологиялық саябақ — еліміздегі ең ірі әрі бірегей жасыл аймақтардың бірі ретінде танылған экологиялық және ғылыми маңызы жоғары мәдени кеңістік. Шымкент қаласының табиғи келбетін көркейтіп тұрған бұл саябақ 1979 жылы бұрынғы қоқыс алаңының орнына абаттандырылып, жасыл желекке айналдырылған.

Бүгінде саябақтың жалпы аумағы 117 гектарды құрайды. Мұнда 80 мыңға жуық ағаш пен 1360-тан астам бұта түрі өсіріледі. Бұл өсімдіктер әлемі тек әсемдікпен ғана емес, ғылыми-экологиялық құндылығымен де ерекшеленеді.

Айрықша атап өтерлігі, саябақ аумағында Қазақстанның өзге өңірлерінде кездесе бермейтін сирек және экзотикалық өсімдік түрлері де сақталған. Бұл жағдай оның ботаникалық және ғылыми маңызын арттыра түседі. Сонымен қатар, дәл осы саябақта Қазақстан аумағында алғаш рет Солтүстік Америкадан әкелінген қызғалдақ түрі өсірілгені де оның ерекше тарихын айқындайды.

Саябақтың маңызды мәдени нысандарының бірі — «Атақты тұлғалар аллеясы». Бұл аллеяда өз қолымен ағаш отырғызған белгілі тарихи тұлғалардың ізі қалған. Олардың қатарында Дінмұхамед Қонаев, Мұхтар Әуезов, Асанбай Асқаров, Сүлеймен Демирель сынды мемлекет және қоғам қайраткерлерінің есімдері ерекше құрметпен аталады.

2016 жылы қалалық мәслихаттың шешімімен саябаққа Оңтүстік Қазақстан облыстық партия комитетінің бірінші хатшысы болған Асанбай Асқаровтың есімі берілді.

Бүгінде дендрологиялық саябақ — қала тұрғындары мен қонақтары үшін табиғат аясында тынығуға, серуендеуге, спортпен айналысуға және отбасымен сапалы уақыт өткізуге мүмкіндік беретін, экологиялық тепе-теңдікті сақтауға үлес қосып отырған маңызды демалыс орны болып саналады.